កតញ្ញូតា

កតញ្ញូតា

ភាវៈនៃអ្នកដឹងគុណ

បទកាកគតិ

កតញ្ញូតា	មានន័យប្រាប់ថា		ជនកតញ្ញូ
ត្រូវតែប្រព្រឹត្ត	តាមបែបគំរូ		ដែលព្រះជាគ្រូ
	ប្រាប់ឲ្យតបគុណ ។
មាតាបិតា	គ្រូឧបជ្ឈាយ៍		សុទ្ធតែស្រែបុណ្យ
ជនណាក៏ដោយ	ដែលគេមានគុណ		ក៏ជាស្រែបុណ្យ
	ដែលត្រូវសាបព្រោះ ។
បណ្តុះពូជបុណ្យ	ក្នុងស្រែជាគុណ		កុំឲ្យមានមោះ
បុណ្យនឹងកើតកើន	ចម្រើនឥតខ្ចោះ		ត្រូវមានចិត្តស្មោះ
	កុំលុបបុណ្យចោល​ ។
កុំគ្រាន់តែថា	មាតាបិតា		មានគុណជាគោល
មាត់ថាត្រូវតប-	គុណកុំច្បោលៗ		ធ្វើដែរស្រាលៗ
	សោះតែគេថា ។
ជនអ្នកតបគុណ	ព្រះពុទ្ធមានបុណ្យ		ទ្រង់ត្រាស់ទេសនា
សរសើរញឹកញយ	មានក្នុងសាស្ត្រា		គម្ពីរដីកា
	គួរយើងចង់ចាំ ។
ចេះចាំហើយធ្វើ	ដោយចិត្តអើពើ		ឲ្យស៊ប់ឲ្យស៊ាំ
ឲ្យស្និទ្ធដឹងគុណ	គុណតែងថែទាំ		ពុំមានខ្ទេចខ្ទាំ
	ព្រោះតបគុណទេ ។
ជនមានចិត្តខ្សោយ	ច្រើនតែធ្វេសធ្លោយ		រមិលគុណគេ
អាងព្រេងសំណាង	ពីក្នុងបុព្វេ		ប្រហែសធ្វេសទ្វេ
	ព្រងើយកន្តើយ ។
អ្នកប្រាជ្ញប្រាប់ថា	ជនប្រុសស្រីណា		លុបគុណចោលហើយ
ជនប្រុសស្រីនោះ	ពុំមានសុខស្បើយ		យូរប៉ុន្មានឡើយ
	រែងតែធ្លាក់ខ្លួន ។
កំពុងបានសុខ	ស្រាប់តែមានទុក្ខ		ចេញមកផ្ទួនៗ
ឲ្យផលកំណាច	ឃោរឃៅឥតស្ងួន		ទោសមកពីខ្លួន
	រមិលគុណគេ ។
ទេព្តាគេខឹង	ព្រោះខ្លួនរឹងត្អឹង		អាងបុណ្យបុព្វេ
ទោសបច្ចុប្បន្ន	ជិះជាន់ឥតល្ហែ		ភ័ព្វព្រេងបុព្វេ
	បើមានក៏ផ្អាក ។
ទោសរមិលគុណ	រារាំងមុខបុណ្យ		ព្រេងឲ្យសម្រាក
បង្អង់ឈប់សិន	បាបថ្មីវិបាក		ឲ្យផលឥតស្រាក
	ព្រោះបានឱកាស ។
បុណ្យបាបចាស់ថ្មី	តែងតែរំពៃ		ពុំមែនផ្តេសផ្តាស
កាលមានចន្លោះ	ត្រូវពេលសស្រ៊ាស		ហាក់ដូចប្រកាស
	ប្រាប់ថាត្រូវអញ ។
ចេញមុខផ្តល់ផល	សុខទុក្ខឲ្យដល់		ជនណាដែលកាញ់
កសាងបង្កើត	កំណើតជាអញ		អញជាសម្លាញ់
	ត្រូវអញឲ្យផល ។
រីបុណ្យឬបាប	ដែលមានសភាព		ជាកម្មតែងផ្តល់
សុខទុក្ខឲ្យជន	អ្នកធ្វើឲ្យដល់		នូវក្តីសល់វ៉ល់
	ឬក្តីសុខសាន្ត ។
បាបតែងរារាំង	បុណ្យឲ្យនៅគាំង		ផ្អាកសិនពុំបាន
ចេញមុខឲ្យផល	ជាសុខសម្រាន្ត		អ្នកធ្វើតែងបាន
	ទទួលរងទុក្ខ ។
បុណ្យក៏រារាំង	បាបឲ្យនៅគាំង		ផ្អាកពុំចេញមុខ
ព្រោះមានឱកាស	បុណ្យផ្តល់ក្តីសុខ		សុទ្ធតែមានមុខ
	ទីទៃពីគ្នា ។
ហេតុនោះគួរជន	កុំនៅទម្រន់		ក្នុងក្តីខ្ជីខ្ជា
គួរកសាងបុណ្យ	មានគុណមហិមា		ទើបបានឈ្មោះថា
	អ្នកស្រឡាញ់ខ្លួន ។
			ព.ស.២៥១២
វត្តឧណ្ណាលោមភ្នំពេញ, ថ្ងៃទី ២៦ ខែធ្នូ			-----------------
			គ.ស.១៩៦៨
		ព្រះហស្ថលេខា សម្តេចព្រះសង្ឃរាជ ជ.ណ. ជោតញ្ញាណោ អ.ប.ស.-អ.ម.រ ស្រង់ចាកសៀវភៅទស្សនៈ សម្តេចព្រះសង្ឃរាជ​         ជួន ណាត