កាតព្វកិច្ចកូនល្អ

(បទព្រហ្មគីត)

១-	កូនល្អត្រូវប្រឹងរៀន	គ្រាន់ជាស្ពានចម្លងទុក
	ថ្ងៃនេះដល់ថ្ងៃមុខ	ជាក្តីសុខសែនវែងឆ្ងាយ ។
២-	ត្រូវចាប់យកជាស្ពាន	ពាក្យទូន្មានឪពុកម្តាយ
	កុំភ្លើននាំបង់កាយ	ក្នុងអបាយមុខផ្សេង ៗ ។
៣-	មុនរាប់រកមិត្រភ័ក្តិ៍	បើស្គាល់ជាក់គេរមែង
	ស្អប់ខ្ពើមអំពើល្បែង	អ្នកនោះឯងមិនខុសទេ ។
៤-	កាន់ខ្ជាប់នូវសីលធម៌	ថ្លៃបវរពីបុព្វេ
	ខ្មែរយើងពីបុរេ	ល្អលើសគេលើលោកា ។
៥-	ត្រូវចេះសាមគ្គីគ្នា	ឲ្យទៅជាធ្លុងមួយណា
	មាននំនែកអាហារ	ថែមសង្ខ្យាជុំប្អូនបង ។
៦-	កុំប្រើពាក្យអាមឹង	មីហែងនឹងគ្មានផ្លែដង
	អឺអើអញហែងហង	ឫកពារឆ្គងមិនសមឡើយ ។
៧-	រំលែកទុក្ខធុរៈ	កិច្ចការផ្ទះរៀបឲ្យហើយ
	ពុកម្តាយបានធូរស្បើយ	គេងកល់ខ្នើយបានស្រួលខ្លួន ។
៨-	ទោះមានប្តីប្រពន្ធ	កុំភ្លេចគុណលោកពីស្ងួន
	លោកធ្លាប់បីអង្រួន	ពុំដេកពួនចាំមើលថែ ។
៩-	បើបានបាយសម្ល	ឬបបរកុំត្អូញត្អែរ
	យកចេកជូនពុកម៉ែ	កុំចាំតែគ្នាយកទៅ ។
១០-	ពុកម្តាយនៅឯផ្ទះ	ក្រៀមក្រពះចាំមើលផ្លូវ
	ថាតើពេលណាទៅ	កូនឆោមឆ្លៅនឹងឃើញគាត់ ។
១១-	លុយកាក់ច្រើនឬតិច	បេះក្តួចក្តិចកុំប្រែព្រាត់
	គ្រាន់លោកចិញ្ចឹមមាត់	ហើយចូលវត្តវ៉ានឹងគេ ។
១២-	ទាន់លោកឈរនៅនឹង	មិនទាន់ពឹងរនាបគ្រែ
	ធ្វើអ្វីមិនកើតទេ	ត្រូវគ្នាន់គ្នេរខំបម្រើ ។
១៣-	កុំនាំរឿងនឹងគេ	វាយតប់ជេរបញ្ចើចចើ
	អ្នកជិតខាងទេតើ	សន្តិប្រើគួរកុំភ្លេច ។
១៤-	ឃ្លោងឃ្លាបានរ៉ាយរ៉ាប់	បើសិនត្រាប់មិនបំភ្លេច
	ចាំគ្រប់ពេលជានិច្ច	ផលសម្រេចនឹងចម្រើន​ ។

                ដោយ៖ កើយ ចិត្រា