វៀចគល់ត្រង់ចុង

(ឧបមាភាសិត)

អ្នកដែលប្រមាទកាលពីដំបូង	ក្រោយកែប្រែយោងពុំនៅកន្តើយ
ដោយមិនប្រមាទមិនប្រហែសឡើយ	ឈោងឈានរកត្រើយលះគ្រឿងស្មោគ គ្រោក ។
គឺជននោះហើយព្រមដោយតម្រិះ	តែងធ្វើលោកនេះឲ្យភ្លឺពន្លក
ប្រៀបដូចព្រះចន្ទផុតពីពពក	ចាំងបំភ្លឺលោកឲ្យភ្លឺចិញ្ចែង ។
ជនអាប់បញ្ញាដឹងថាខ្លួនល្ងង់	ខិតខំលះបង់មានៈខ្លួនឯង
ស្តាប់ពាក្យទូន្មានបណ្ឌិតថ្លាថ្លែង	បុគ្គលនោះឯងរមែងថ្កើងថ្កាន ។
រីជនមានប្រាជ្ញអង់អាចភ្លេចខ្លួន	ធ្វើចេះហួសក្បួនអាងខ្លួនប្រាជ្ញបាន
ចុងក្រោយយូរឆាប់យ៉ាប់លំបាកប្រាណ	ធ្លាក់ចុះពុំខានស្មានខ្ពស់ហួសហេតុ ។

                                                                      ដោយឧបាសក៖ គុយ សុធន